चालकको उच्च रक्तचापले दुर्घटना निमत्याउन सक्छ

नयाँ पाइला
३ हप्ता पहिले
चालकको उच्च रक्तचापले दुर्घटना निमत्याउन सक्छ

बलेवा, २१ फागुन। अधिकांश सवारी चालकमा उच्च रक्तचापको समस्या देखिएको छ ।

सडक दुर्घटना न्यूनीकरणका लागि जिल्ला ट्राफिक प्रहरी कार्यालयले सडकमै गरिएको स्वास्थ्य परीक्षणमा उनीहरुमा उच्च रक्तचापको समस्या देखिएको हो । जिल्ला ट्राफिक प्रहरी कार्यालयले लामो दूरीका सवारीसाधनका चालकलाई लक्षित गरी निःशुल्क स्वास्थ्य परीक्षण कार्यक्रम सञ्चालन गरेको थियो ।

स्वास्थ्य परीक्षण गर्दा अधिकांश चालकमा उच्च रक्तचापको समस्या देखिएको जिल्ला प्रहरी कार्यालयका सूचना अधिकारी चिरञ्जीवी कोइरालाले बताए।

“चालकमा देखिएको स्वास्थ्य समस्याका कारण सडक दुर्घटना हुन सक्छ”, उनले भने, “उच्च रक्तचाप भएको चालकलाई अस्पताल जान अनुरोध गर्नेबाहेक कुनै पनि कारवाही गर्ने अधिकार प्रहरीसँग छैन् ।”

“एक चालकको रक्तचाप देखेर हामी डरायौँ”, सूचना अधिकारी कोइरालाले भने, “त्यति धेरै रक्तचाप भएको चालकको जुनसुकै बेला आँखा तिरमिराउने चिकित्सक भन्दै हुनुहुन्थ्यो, तर हामीले रोक्न सकेनौँ ।”

प्रहरीले स्वास्थ्यकर्मीको सहायतामा मुटुको चाल, रक्तचाप, आँखाको समस्यालगायतको परीक्षण गर्ने गरेको छ । परीक्षणका क्रममा समस्या देखिएका चालकलाई तत्काल अस्पताल जानका लागि आग्रह गर्ने गरेको भए पनि बेवास्ता गर्ने गरेको कोइरालाले बताए। प्रत्येक महीना स्वास्थ्य जाँच गर्ने योजना बनाएको प्रहरीले धवलागिरी अञ्चल अस्पतालका चिकित्सकको सहयोगमा सावरी चालकको जाँच गरिएको हो ।

जिल्ला ट्राफिक प्रहरी कार्यालय बागलुङसहित धवलागिरि अञ्चल अस्पताल बागलुङ, यातयात व्यवसायी र नेपाल प्रहरीको टोलीले सडकमै चालकको स्वास्थ्य परीक्षण गरेका थिए ।

जाँचका क्रममा बस, ट्रक, जिप, माइक्रोबसलगायतका ७१ सार्वजनिक सवारीसाधन चालकको आँखा र रक्तचाप परीक्षण गरिएको थियो । परीक्षणका क्रममा १२ चालकको उच्च रक्तचाप भएको जिल्ला ट्राफिक प्रहरी कार्यालयका प्रहरी नायब निरीक्षक शुकबहादुर विकले बताए।

पहिलो पटक गरिएको परीक्षणमा कति सहभागी भए र कतिमा के–कस्ता समस्या थिए भन्ने विषयमा प्रहरीसँग कुनै पनि जानकारी छैन । यो पटक भने सबैको तथ्याङ्क राखेर समस्या भएका चालकलाई निगरानीमा राख्न ट्राफिक प्रहरीलाई निर्देशन दिइएको कोइरालाले बताए।

सानासाना कमजोरीका कारण पनि ठूला दुर्घटना हुने गरेको भन्दै कोइरालाले चालकमा हुने आँखाको कमजोरी र रक्तचापको समस्या दुर्घटनाको कारण हुनसक्ने बताए। चालकमा देखिएको स्वास्थ्य समस्याका विषयमा आम नागरिक समाजले समेत आवाज उठाउनुपर्ने भन्दै उहाँले त्यसका लागि पहल थालिने बताए।

तपार्इको प्रतिक्रिया